Á fundi bæjarstjórnar 9. mars síðastliðinn lagði Árni Einarsson, bæjarfulltrúi Neslista, fram tillögu um að fela jafnréttisnefnd að standa að könnun á framkvæmd jafnréttisáætlunar bæjarins á síðasta kjörtímabili og leggja fyrir bæjarstjórn ekki síðar en 1. september næstkomandi. Í þeirri könnun verði m.a. skoðað hvernig staðið hefur verið að fræðslu um jafnréttismál og hvernig leitast hefur verið við að jafna stöðu karla og kvenna í samræmi við jafnréttisáætlun bæjarins. Einnig hvernig staðið hefur verið að framkvæmd jafnréttisfræðslu í leik- og grunnskólum og í tengslum við íþrótta- og æskulýðsstarf á vegum bæjarins. Tillagan var samþykkt samhljóða.

Bæjarfulltrúar Neslista og Samfylkingar lögðu fram fyrirspurn um meðferð persónuupplýsinga af hálfu bæjarins á fundi bæjarstjórnar 23. mars sl. Tilefni fyrirspurnarinnar er að í tvígang á stuttum tíma hefur Persónuvernd metið meðferð bæjarins á persónuupplýsingum og tölvupósti starfsmanna óheimila og ranga.

Bandalag starfsmanna ríkis og bæja, BSRB, sendi sveitarstjórnarfulltrúum bréf 15. desember síðastliðinn þar sem þeir eru hvattir til samfélagslegrar ábyrgðar við fjárhagsáætlanagerð ársins 2011. Í bréfinu segir m.a. að fjárhagsáætlunin leggi línurnar fyrir öryggi íbúa og kostnaðinum við velferðarkerfið eigi að dreifa, hvort sem er til þjóðarinnar í formi skatta, eða íbúa sveitarfélaga í formi útsvars. Sveitarstjórnarfulltrúar eru hvattir til þess að falla ekki í þá freistingu að slá sig tímabundið til riddara með því að nýta ekki útsvarsprósentuna til fulls, en mæta fjárþörfinni frekar með hækkun gjalda.